Слатко од портокали

Ова слатко е и од кората на портокали, но и од помали и поголеми парчиња од портокали, а ставив и еден лимон. Количина сами си одредувате, ги мерите портокалите пред варење, кога ќе ги подготвите во парчиња, фигури и полжавчиња. Најубаво е портокалите да имаат дебела кора.
Е сега цела година имаме портокали, кога со дебела кора, кога со тенка, ниту сезона се знае, ниту вкусот е ист како оној кој го носиме во нашите сеќавања…
Сепак нека има малку, токму како се правело порано, од сé помалку.

Состојки

• 1 кг. кори и парчиња портокали
• 1 кг. шеќер
• 2 лимони
• 2 ванили
• 500 мл. вода

Постапка

1. Најпрво ги правев полжавчињата и разни фигурички од корите, добро измиени, количина по желба. Полжавчињата се долгнавести парчиња кора, свиткани во кругче и сошиени со конец, па нанижани заедно во круг.
2. Ставете ги во ладна вода подготвените полжави и фигури, по некоја фигура и од лимон и после неколку минути вриење, сменете ја водата.
   
3. Направете го тоа многу пати, јас скоро десет пати ја сменив водата која зовриваше кратко, до 3 минути…
4. Додека тече таа постапка, ги подготвувате другите помали и поголеми парчиња, а најпрво изрендајте ја кората на портокалите многу внимателно, па сечете по желба разни парчиња, подгответе и парчиња од лимонот.
5. Сега ставете го шеќерот и водата да зовријат за шербетот.
6. Ставете ги прво парчињата да повријат со малку сок од лимон…
7. По некое време, додадете ги полжавите и фигурите од кората, тие се веќе сварени.
   Не заборавајте да го извадите конецот.
8. Слаткото е готово кога ќе стане прозрачно и кога шербетот ќе биде по желба густ.
9. Јас не го сакам многу густ, но тоа се вкусови.
10. Додадете ги ванилите на крај и оставете го покриено со влажна кујнска крпа да се олади, па потоа ставете го во стерилни тегли.
    Уживајте во едно од најубавите слатка!