Штом дојде пролетта во Струмица, се прави татлии со пресно сирење.
Се прави за Прочка, за Велигден, но и во обични денови.
Многу брзо се прави, ама сепак треба да ти се погоди, како велиме и на изглед, и на вкус и на шербет.
Инаку кај нас Струмичани, множината се користи да се изрази еднина, па така татлија тава е татлии. И едно парче е татлии. Токму тоа е една од главните одлики на струмичкиот дијалект, сигурно сум кажала веќе. Мислам дека се вели и татлииј, тоа ј едвај се слуша.
Но заради природните миграциските процеси, веќе овој говор е во изумирање.
Затоа од време на време го користам и на блогот, тоа е мојот јазик кој го употребувам и денеска, јазикот на кој сеуште си мислам 🙂
Татлиита често се меша со равании. Но разликата е огромна, раваниита не е со пресно сирење, а може да и се додаде ореви, бадеми…
Татлијата е без додатоци и се прави со пресно сирење.
Секако во Струмица опстојуваат повеќе рецепти во зависност од потеклото на оној што ја прави.
Состојки
- 4 јајца
- 1 филџан шеќер
- 600 гр пресно сирење
- 1 филџан зејтин
- 1 филџан гриз
- 2 филџани брашно
- 1 прашок за пециво
За шербет
- 1 ванила
- 1 лимон
- 1 кг шеќер и вода да го покрие шеќерот, за шербет
Постапка
- Се матат јајцата со шеќерот, но уште поубава е одвоено белки од жолчки.
- Се додаваат состојките и се меша убаво да се соединат.
- Се става во премачкан плех со маснотија бр.30 и убаво се распостила.
- Се пече подолго време на 200, зависи од рерната, но треба да добие темна боја одозгора.
- Се сече по желба кога ќе се подизлади.
- Се подготвува шербетот према вкус, се додава ванила и крукчиња лимон и се полива, врел шербет на подоладена татлии.
- Полиена се враќа кратко во рерна, околу 10 мин.
Татлијата треба да биде темна одоздола и одозгора и жолта- килибар во средина, тогаш е погодена, по старинскиот рецепт.
Овој пат е повисока зашто плехот е 28 број, па затоа нагласувам користете број 30, не треба да е многу висока, но преубава беше и вака.
Вкусот со пресно или младо, несолено сирење е неповторлив! Колку подолго стои, поубава е, може во фрижидер да ја чувате, покриена со транспарентна фолија.
За моите следбеници во Швајцарија, овде користам fromage frais nature-Migros. Многу е различно на изглед од младото сирење кај нас, ова како крем е, но вкусот ми е најубав од сите што сум ги пробала.
П.С. И ете изумив да речам дека порано кога млекото ќе се “расипело”, од тоа се правело татлија. Зашто тоа е само трансформација на млекото, а нашите баби и мајки веднаш му нашле како да го искористат. Благодарам Јована Тренчевска на потсетувањето!
Пријатно!
