Еве нешто од празничните рецепти, најбараниот рецепт…
Оревите знаеме да ги ставиме во многу солени јадења, печени пиперки, пинџур, модри патлиџани…
А во Швајцарија, едно од најубавите сирења ми беше токму сирењето со ореви.
Овој рецепт е со бело сиренце и исто така е преубав.
Е сега се обидувам да се сетам, што сé сум ставила, зашто подготвував многу работи одеднаш, па и инспирацијата ми беше моментална. А бидејќи не можев да сликам детално што правам и што додавам, значи немам детални работни слики, сега ќе се присетувам…
Сакам да речам, и да не се сетам што сé има внатре, не треба да е проблем. Вие направете си го по ваш вкус, тоа е најдоброто и највредното, само треба да сте отворени и за нови комбинации, и за нови вкусови…
Состојки
- 350 гр бело сирење
- 1 -2 лажици павлака
- 1 шака сецкани ореви
- издробена сува пиперка
- 2- 3 чешниња пресован лук
- една шака пржен сусам
- издробено чили пиперче или лут буковец
- црн пипер
За посипување
- 100 гр толчени ореви (имав и мелени)
- ситно сецкан рузмарин
Постапка
- Најпрво испржете во едно тавче сусам со постојано мешање.
- Сирењето испасирајте го убаво. Користам мешано на Здравје или на Идеал шипка, кравјо, но секако одберете си по ваш вкус.
- Сега додадете ги сите состојки, но и други, по ваша желба.
- Убаво измешајте ја смесата и со раце направете долгнавеста форма.
- На фолија ставете ги оревите и рузмаринот, па увалкајте го сирењето, завиткајте го и ставете го на ладно да се стегне.
Ако сирењето не е солено, додадете и сол, по желба. Павлака додадете за да се направи покремасто.
И тоа е сé, преубаво мезе, посебно за љубителите на сирење.
Доста јако е на вкус, но е одлично мезе.
Декоративно многу, а и превкусно.
Пријатно!
[gallery_one id=”12296″ view=”carousel” settings=”%7B%22pause%22%3A%2210000%22%2C%22speed%22%3A%221000%22%2C%22loop%22%3A%221%22%2C%22auto%22%3A%221%22%2C%22pager%22%3A%221%22%2C%22lightbox%22%3A%221%22%7D”]