Модри патлиџани во тесто

Модрите патлиџани, па во тесто, преубав предизвик 🙂 Едвам дочекавме да сликам и да пробаме. Превкусно беше, а ни кошничките не останаа…

Состојки

2-3 големи патлиџани
500 гр мелено месо
1 црвена пиперка
2 зелени пиперки
2 лажици концентрат од домати или 1 свеж
по желба сол, црн бибер, црвен пипер, сушен зачин, оригано, нане, босилек,ќебап за мелено месо, мешан зачин за месо, магданос
по потреба зејтин
по потреба кашкавал за одозгора

Тесто

400 гр брашно или повеќе
1 сув квасец
1 лажиче шеќер
3 лажици зејтин
1 лажиче сол
200 мл млака вода

Постапка

Најпрво подгответе тесто кое не мора долго да стасува, обично тесто за пица, најпогодно ми е,
Нека се активира квасецот во малку млака вода и шеќерче.
Просејте го брашното, додадете ја солта, зејтинот и стасаниот квасец, вода постепено. Замесете средно тврдо тесто.
Расукајте кора, расечете парчиња поголеми од садовите во кои ќе ги печете.
Садовите треба да се големи колку еден патлиџан да може да се смести, исечен на половина за да се добијат како две чаши.
Премачкајте ги со зејтин садовите и ставете од парчето тесто, полепете го на зидовите и направете на обрачот на садот како фалтички.
Сега измиените патлиџани, како што реков, сечете ги на половина, да се добијат како 2 чаши, направете им рамно дно со отсекување кришка на краевите. Посолете ги, нека постојат 10 минути, па измијте ги.
Сега издлабете ги во средина, а таа средина исецкајте ја ситно, ќе ви треба за во месото. Патлиџаните се подготвени, ставете ги во тестото, посолете ги внатре малку. Сите садови ставете ги во поголемо тавче, полесно се вадат и ставаат во рерна на овој начин.
На крај, испржете ги пиперките и сецканите патлиџани, додадете го месото, свртете го неколку пати, потоа доматите, а на крај зачините. Треба само малку да се испржат, зашто ќе се печет. Наполнете ги патлиџаните и ставете да се печат на 200 степени. Пред крај ставете одозгора рендан кашкавал само колку да се растопи.

Напомени

Треба да се внимава да не изгорат тестата одозгора, затоа нека се печат прво од долната страна, значи рерната да работи одоздола. Јас ги ставам садчињата во тавче, така полесно се манипулира со нив, но со тоа има дупло дно, па затоа одоздола нека се пече повеќе, да не останат живи корпињата.
Зачините се многу битни, ставив и од зачинот ќебап кој е преубав за мелено месо и уште еден мешан со рузмарин и дафинов лист… Милина од ароми.
Ова јадење е всушност една моја варијанта со месо на Имам бајалди, најубавото летно јадење. Таму преовладува лук и магданос, овде зачините се главни…

Се сервира со кисело млеко, павлака, препечено лепче…
Одлично летно мезе, ароматично, лесно за јадење…
Никогаш доста од модрите патлиџани!

Пријатно!