Пиперки со урда во летна манџа

Овој летен ручек сите го правиме во разни комбинации и варијанти, едноставно, но вкусно.
Колку и да ни е топло, пржиме, нема шала 🙂
Една од варијантите…

Состојки

• пиперки за пржење
• домати
• 1 јајце
•  урда
• 2 чешниња лук
• магданос
• 1 лажиче шеќер
• сол, сушен зачин, црн пипер, буковец
• зејтин

Постапка

1. Измешајте ја урдата со јајце или само жолчка, додајте лук и магданос.
2. Исчистете ги пиперките од дршките и семките и наполнете ги со урдата.
3. Затворете ги со доматче или парче леб, за да не истече амурот.
4. Испржете ги пиперките.
5. Извадете ги пиперките во сад, а во тавата додадете пиперки на парчиња.
6. Откако ќе се испржат, додадете лупени домати.
7. Испржете ја летната манџичка, додадете лажиче шеќер и други зачини, по желба.
8. Прелијте ја летната манџичка врз пиперките.

Обично комбинирам со компирчиња.
На здравје!

П.С. Тајната на убавиот ручек е во пиперките, секако. Немам овде пиперки да бирам, но меракот е голем. Нашите пиперки, посебно пржаљки или каврџик се најубави, незаменливи и неспоредливи 🙂