Богата летна салата

Од летните салати, тиквиците, модрите патлиџани и пиперките ни се најчесто на трпезата, покрај доматите и краставичките. Салатата е здрава, вкусна, богат вкус!

Ништо посебно не треба да се прави, едноставна подготовка.
Треба само добра организација во исто време да се прават повеќе работи, е а тоа ми е специјалност, како што вели маж ми 🙂
Најдобро се снаоѓам во такви услови, предизвик ми е 🙂 Да не е до гостилничарскиот ген?
Ќе ме биде ли за ресторан? Дааа, ељам да наредувам како шеф 🙂

Овој пат, салатата малку помодерно стокмена, иако класичните ми имаат предност, ама овој сос е преубав 🙂 Ќе си го дотерате на вкус, може да додадете ленено семе, ким, сусам, по желба.

Состојки

• неколку пиперки
• тиквица
• модар патлиџан
• маслиново масло
• лук
• сол
• оцет
• лимон
• мајонез
• сенф
• кисело млеко или јогурт
• магданос

Подготовка

1. Модриот патлиџан се сече на кришки и се посолува.
2. Додека се чека да се пушти лутата вода, се сечат тиквичките на кришки и се редат во плех, на хартија.
3. Пиперките се подготвуваат за печење, исто.
4. Потоа патлиџаните се мијат, се сушат и се редат во плехот.
5. Тиквиците и патлиџаните се премачкуваат со маслиново масло и се посолуваат.
6. Се печат на горната решетка, на 250 степени.
7. Се вадат, а пиперките веднаш во кеса да се задушат за полесно вадење на лушпата.
8. Се редат во тањир, се солат, пак маслиново, малку оцет, пресиран лук, магданос и сосот.
9. За сосот, се меша мајонез, лимон, сенф малку и кисело млеко, за да се разводни и вкусот и текстурата…
10. Обилно се посипува со сос, јас додадов подоцна повеќе…

Салатата може да ја исечете на коцкички, и така е уште поубаво, обилно покриена со сосот…

Ако не ви собира во еден плех, стуткајте ги малку, ќе се испечат, секако. Пиперки какви имате, такви, имав црвени тогаш…

Пријатно!